25 يناير 2011 & 2012 الثورة وذكراها

25 يناير 2011 & 2012 الثورة وذكراها
زي اليومين دول... كان الترتيب لمسيرة من كل ميادين وأحياء مصر، و كان محدد لها يوم 25 يناير، اللي كان عيد الشرطة.
يوم عيد الشرطة واللي حصل كان سلمي تماما!!! بدأ بمسيرة، وكان خلالها تصفيق حاد للشرطة اللي موجودة في الشارع واللي كانت متواجدة حوالين المسيرات..!!!
بدأت الفكرة من على الفيسبوك لما دعت صفحة "كلنا خالد سعيد" للمسيرة السلمية...!!
لكن لأن العنف وسوء الإدارة اللي كان موجود في البلد هو اللي كان سائد، حصل اللي حصل يوم 28 يناير،، وسيبوا علينا البلطجية... ونزلنا لجان شعبية و...و...و... الباقي طبعا انتوا عارفينه.
أنا كل اللي أتمناه إن أحداث 28 يناير واللي بعدها ما تتكررش تاني... لاني شايفة بوادر غير مبشرة.. ويمكن يبقى فيه دم كتير!!!
يا عقلاء مصر... رجاء رجاء رجاء... ما نكررش الغلطات السابقة ونقع في نفس الفخاخ والكمائن المنصوبة لنا... عايزين نتجنب الدم والمشاكل اللي ممكن تحصل...!!!
وعشان افكركوا باللي حصل قبل كدة واللي ممكن يستغل لإفشال كل اللي بيتعمل هو الآتي:
· أحداث 28 يناير والسرقة والنهب والبلطجة الحرق
· موقعة الجمل
· المشاكل اللي حصلت في صول وأطفيح ومحاولة إثارة الفتنة بين أطياف الشعب (لازم نبقى انصح من كدة)
· أحداث ماسبيرو
· أحداث محمد محمود والوقيعة بين الشعب والجيش، وقصة الطرف الثالث
· أحداث مجلس الوزراء وحرق تراثنا في المجمع العلمي
· اللي بيحصل كل يوم من بلطجة وسرقة وقلة أدب في الشارع
· أحداث ست البنات
· وغيره...وغيره
اعتقد إن إحنا خدنا وفهمنا الدرس كويس، ولو عايزين مصر قوية، لازم تبقى سلمية، ولازم نبقى قد المسئولية ونحمي سلميتها... إحنا عايزين بلد قوي ووطن جميل وشعب متعلم ونظيف من جوة ومن برة!!! عايزين نرجع القيم لمصر، عايزين نشتغل ونبني بدل ما نكسر!!
أنا بلغت رسالتي، وأتمنى إنها توصل لذوي العقول المستنيرة والقلوب اللي بتحب مصر..!!!
بحبك يا بلادي!!!

آآآآآه ه ه ه ه يا بلد أكستــــرررررريييييــــــــمممم

عجبتني اوي فقررت انشرها في مدونتي:):)

هو احنا يا قناة التت والرقص يا اخوان و سلفيين !!!

هو احنا يا نقاب و برقع يا مش لابسين !!!

هو احنا يا عشوائيات و زبالة يا فلل و قصور ببسين !!!

هو احنا يا ثورة و تحرير يا نقول للظالم اسفين !!!

هو احنا يا دقن و جلابية يا محشش بيسب الدين !!!

هو احنا يا نألش و ننكت يا ننكد عل البنى ادميين!!!

هو احنا يا اما انترناشونال يا مدارس بتعوم فى الطين !!!

!!!!!!!!!!!!!!!حااااجة تنقط.....يا بلد اكستريييييم

آه يا ليل يا زمن،،،!!!!

آه يا ليل يا زمن،،،!!!!

النهاردة اول يوم العيد،، وكل القناوات جايبة الافلام المعتادة،، زي صغيرة علحب، وغيره،،، وانا بأقلب القناوات لفت نظري فيلم بقالي كتير ما شفتهوش،، فيلم آه يا ليل يا زمن لوردة ورشدي أباظة،،

لما تشوفوا الفيلم دة، وهو عن قصة حقيقية حصلت فعلا،، حتعرفوا ثورة 23 يوليو 1952 عملت ايه في ولاد الناس،،،

التأميم،، والجعانين اللي مسكوا البلد،،، ومراكز القوة،، وتأليب العيش والنهب،،، وولاد الناس ف

ضلت مش لاقية تأكل...

لما شفت الفيلم دة عرفت ان التاريخ بيعيد نفسه تاني وتالت ورابع،،، وحنفضل في نفس الحلقة المفرغة...

احنا بنبهدل الحاجة الكويسة اللي في ايدنا ومش عارفين قيمتها،،، الناس الكويسة بتدخل السجن،، وسايبين الحرامية والبلطجية وقطاع الطرق برة.... سايبين الفساد زي ما هو.. الرشوة اللي أول السنة كانت جنية دلوقتي بقت 1000 جنيه،،، ومحدش عايز يشتغل أو يعمل اي حاجة...

أنا بأوجه كلامي للعقلاء اللي في البلد،، واللي ممكن يفهموا الكلام ده... لازم نحافظ على الكويس اللي في بلدنا،، وننميه،، ونحاول نبني ونفهم الناس اللي مش فاهمة... دة صحيح حياخد وقت ومجهود،، بس لو كلنا حطينا ايدينا في ايدين بعض حنقدر نعمل حاجات كتيرة اوي...

اللي حاصل دلوقتي تماما زي اللي كان حاصل قبل كدة،،، صراع على الكراسي والسلطة،، ومحدش بيفكر في مصلحة البلد،، واللي بيحاول يعمل حاجة كويسة للاسف يا اما بيزهق،، او بيتقبض عليه.... التاريخ بيعيد نفسه تاني وتالت ورابع... انا خايفة اقول انه "مافيش فايدة"

يا ريت حد يكدبني ويقولي ان فيه امل ان حد ييجي يكون بيحب البلد ديه،،،، وزي ما قلت قبل كدة: دايما كان اللي بيحب البلد ديه مش منها،، مع الاسف...

رجعنا لنقطة صفر تاني...!!!

رجعنا لنقطة صفر تاني...!!!

احنا بنرجع لوراء وللا ايه؟؟ ليه اللي بيحصل دة ولصالح مين!!

لصالح مين ان ولاد بلدنا يموتوا، وللاسف مش في الحرب، لكن في الهبل وبأيد مصريين زيهم...

احنا كدة بنهدم بلدنا... ومش حنقدر نبنيها بسهولة..!!

لو عايزين بلدنا... لازم نقف ونحاسب نفسنا.. اللي بنعمله حيودينا على فين...

انا فعلا مش شايفة قصادي غير طريق مظلم.. وعر... ومالهوش آخر...

يااااا خساااارة يــــااااااا مــــصــــررررر.... يا خـسـاااااارة!!

يا خسارة دانتي فيكي كل حاجة، لكن ولادك مش عايزين يعملوا لك اي حاجة علشان تفضلي مـــصــر!!!

كان نفسي اشوفك على طول عروسة حلوة بفستان ابيض،،، انا شايفاكي دلوقتي من بعيد،، فستانك الابيض متلطخ بدم ولادك،، ومقطع من كل حتة،، كل جهة شدت في ناحية ومزعته، وللاسف بان لحمك الغالي للكل،،، ومين يسترك غير ولادك.!!!

ولادك دلوقتي مش فاضيين،،، سايبينك وبيضربوا في بعض،، وسايبينك فريسة لكل كلب ينهش في لحمك.!!!!

انا آسفة اني باشوفك كدة،،،، يـــا خــســاااررررة يـــااااا مــصــررررر... يـا خـسـااااارررة!!!!

وبعدين... احنا رايحين على فين

قلنا ثورة، وعملناها... قلنا ديمقراطية،، وحرية وعدالة اجتماعية،،، وما فيش حاجة حصلت...

كل اللي حصل هو الهيصة،،، لا اللي كان بيشتغل عارف يكمل شغله،، ولا اللي كان يادوبك عارف يلاقي اللاضااا،،، والحالة بقت ضنك،،

واللي زاد وغطى هي الاعتصامات والاحتجاجات اللي مالية البلد،، زي ما تكون ماسورة احتجاجات وضربت،،، طب الناس دي كانت فين قبل كدة،،!!!

وهو الحل هي الاعتصامات دي،، ياعني هو الحل يبقى يا احنا نعيش يا اما الكل يموت،،، ؟؟؟ ماهو بالشكل دة لا اللي عايش كويس حيفضل كدة ولا اللي بيعاني حتتصلح حاله. بالعكس دة معناة ان فعلا "عجلة الانتاج فرقعت" وان فعلا الثورة "بتحدف شمال" وعايزة ضبط زوايا

وترصيص...

يا عــااااالم فوقوا بقى... احنا داخلين في مرحلة ما يعلم بيها اللا ربنا...!!!!

مصر غرقت في شبر مية

انتم مصدقين اللي حصل أمبارح والنهاردة؟؟؟ مصر غرقت في شبر مية، وديه أكيد مش أول مرة، لكن دلوقتي إحنا ممكن نتكلم ونبدي استياءنا. قبل كده كانت نفس الحكاية بتحصل، لكن محدش كان بيفتح بقه قعدنا سنين وسنين نستحمل، لكن دلوقتي لا. المشكلة أصلها مبتدتش دلوقتي، دي مبتدية من زمااااان أوي.. من ساعة ما ابتدينا نسكت على الشارع وأحواله، لما كان المفروض يتخطط مظبوط، ويتعمل صرف مظبوط للأحوال اللي زي دية أنا مش حطول عليكوا، أنا بس بلفت نظركوا لما كان في مصر احتلال بريطاني، الانجليز عملوا حساب يوم زي دة، وخططوا لشبكة صرف للمطر. لكن إحنا لما جينا وخدنا البلد، رصفنا الشوارع وسدينا فتحات الصرف وكأن مافيش حاجة معمولة من قبل كده وبدأنا من الاول وجديد. وطبعا علشان نعمل شبكة صرف للمطر تانية زي الانجليز ما عملوها، دة حيكلفنا فلوس كتير أوي، ومش بس كده، دحنا حيوقف حالنا حبة حلوين علشان نعيد التخطيط من أول وجديد. المشكلة مش مشكلة صرف مطر، ولا مشكلة مرور وخلافه، المشكلة اكبر بكتير. المشكلة فينا إحنا كمصريين. مشكلتنا إننا مبنشتغلش بإستراتيجية واضحة، ولا بخطة متكاملة، إحنا بنعمل زي الفراعنة، لما واحد ييجي يمسك الحكم لازم يطمس معالم كل اللي قبلة عملة، ومابنفكرش نبني ونكمل المشوار ومشكلة صرف المطر ديه واحدة من الأعراض الجانبية للسلوك دة. تخيلوا!!! دة معناه إن فيه مشاكل كتيييييررررة أوي بسبب نفس السلوك، اللي يا ريت نغيرة

YES or NO!! Does not matter نعم او لا مش هي دي المشكلة

Dear All,

Just a quick note about the referendum. For me, actually it does not matter YES or NO. What really matters for me is the percentage of participation. I want to see everyone who has a voice and who is allowed to voice out and VOTE, I want them to go and give their opinion, whether is YES or it is NO.
I want to see a new trend in Egypt, a proactive one that makes us use our right to vote, rather than stay passively at home and just shut up as we used to do.
I urge everyone to go and vote, regardless of the result, it is your chance to go and participate in the decision making of your country.

كتابة سريعة وعلى لهوجة مني. بالنسبة لي متفرقش اذا كان نعم أو لا. الاهم بالنسبة لي هو الجموع والعدد اللي حيصوت وبقول رأيه. انا عايزة اشوف كل اللي له الحق انه يصوت يروح ويصوت بغض النظر عن النتيجة، عايزة اشوف اتجاه جديد في مصر فيه الناس بتتحرك علشان تشترك في صنع القرار في مصر، مش بس قاعدين ساكتين في بيوتهم.

انا بأدعو كل واحد ينزل من بيته ويروح علشان يبدي رأيه، بغض النظر عن النتيجة، دي فرصتنا كلنا ان يبقى لنا يد ونشترك في صنع القرار لبلدنا.